“Palmali” Şirkətlər Qrupu Azərbaycan qəhrəmanları, ziyalıları və tarixi guşələrimizi dünya sularında tanıtmağı davam etdirir. “Palmali” Şirkətlər Qrupundan verilən məlumata görə, Mübariz İbrahimovun adını daşıyacaq gəmi oktyabr ayının 15-də Türkiyədə "Beşiktaş" gəmiqayırma zavodundan suya endiriləcək. Armada tipli gəmiyə Milli Qəhrəman Mübariz İbrahimovun adının verilməsi "Palmali" Şirkətlər Qrupunun prezidenti Mübariz Mənsimovun göstərişi ilə həyata keçirilib. Türkiyədə suya endiriləcək gəmi Milli Qəhrəman Mübariz İbrahimovun adını dünya sularında tanıdacaq.

Qeyd edek ki, Azərbaycan Silahlı Qüvvələrinin giziri Mübariz İbrahimov bu il iyun ayının 18-də cəbhənin Tərtər rayonunu Çaylı kəndi istiqamətində Ermənistan silahlı qüvvələrinin hücumunu dəf edərkən bir neçə erməni əsgərini öldürərək qəhrəmancasına şəhid olub. 22 yaşlı gizir Mübariz İbrahimovun meyiti ermənilər tərəfindən götürülüb və hələ də geri qaytarılmayıb. Onun adı ən böyük elektron kitabxana hesab edilən "Vikipediya"ya düşüb.

Xatırladaq ki, oktyabrın 8-də 2009-cu ildə "Palmali" Şirkətlər Qrupu və "Beşiktaş" (Beşiktaş Gemi İnsaat Anonim Şirketi, Тürkiyə) şirkəti arasında 10 armada tipli tankerin inşası ilə bağlı müqavilə imzalanıb. Bu, "Beşiktaş" gemiqayırma zavodundan endiriləcək ilk gəmi olacaq.